Íslenska liðið Cybotrix í lokakeppni Nordic AI Cup

Lið Cybotrix stóð uppi sem sigurvegari í íslenska hluta gervigreindarkeppninnar Nordic AI Cup. Keppnin, sem fór fram á netinu 17. – 20. september sl. fer fram samtímis á öllum Norðurlöndunum og er á vegum Gervigreindarseturs HR (CADIA) og Kveikju.

Í síðustu viku var tekið á móti hópnum í Háskólanum í Reykjavík þar sem CADIA og Kveikja afhentu liðinu sigurlaunin fyrir árangurinn; 500 þúsund króna verðlaunafé.

Lið Cybotrix er skipað þeim Adetayo Adebimpe, gervigreindarsérfræðingi hjá Íslandsbanka, og Defend Iceland og stofnanda vegalingo.is,  Adenike Adebimpe, BA-nema í alþjóðlegu námi í menntunarfræði við HÍ, Quadri Abiodun Busari, meistaranema í alþjóðlegu námi í menntunarfræði við HÍ, og Tolulope Iyanuoluwa Oni, meistaranema í alþjóðasamskiptum við HÍ.

Lokaviðureignin 14. október nk.

Nordic AI Cup er skipulögð af Ambolt AI, sem annaðist allan undirbúning og hönnun verkefnanna í keppninni í samstarfi við the Nordic AI Partnership.

Með sigrinum hér á landi hefur Cybotrix tryggt sér sæti í sjálfri lokakeppninni, þar sem liðið tekur slaginn við fulltrúa hinna Norðurlandanna um titilinn norðurlandameistari í gervigreind.

Lokaviðureignin fer fram á morgun, miðvikudaginn 14. október á Nordic AI Meet, sem er árleg ráðstefna ætluð ungum rannsakendum og framtíðarleiðtogum á sviði gervigreindar.