Ágúst fór vel af stað hjá okkur og þessar fyrstu vikur skólaársins hafa liðið hratt. Ég veit að ég tala fyrir hönd margra okkar í HR þegar ég segi að það er alltaf jafn skemmtileg stemmning og tilhlökkun hér í húsi þegar við sjáum ganga og stofur fyllast af nemendum á ný. Hér eru fastir haustliðir og líka sitthvað annað skemmtilegt og tilfallandi sem rektor hefur verið að fást við í ágúst:

• Hélt opnunarávarp á ráðstefnunni: „Hagfræði og samfélagið“ sem viðskipta- og hagfræðideild hélt í tilefni af því að áratugur er frá því að kennsla til BSc gráðu í hagfræði hófst við HR. 
• Málþingið um áhrif gervigreindar á háskólamenntun var frábært.
• Flutti ávörp og veitti viðurkenningar á forsetalistaathöfn og athöfn vegna nýnemastyrkja og styrkja úr atvinnulífstengdum sjóðum í lok ágúst. Forsetastyrkir eru veittir nemendum sem ná bestum árangri á hverri önn og nýnemastyrkir eru veittir til nemenda sem hafa sýnt framúrskarandi árangur á stúdentsprófi. Úr Námssjóði Sameinaðra verktaka eru veittir námsstyrkir sem nema skólagjöldum í eina önn til nemenda í verkfræði, tæknifræði og tölvunarfræði við HR. Hvatasjóður veitir tveimur nemendum styrk sem hafa annað móðurmál en íslensku og náð hafa góðum árangri í framhaldsskóla. 
• Fundur með arkitektum vegna nýbyggingar HR.
• Vinnufundur deildarforseta vegna fyrirhugaðrar háskólastefnu, góðar umræður sem skiluðu sér í svari frá HR til menningar-, nýsköpunar-, og háskólaráðuneytis sem vinnur að stefnunni.
• Sat fyrsta hádegisfund rektors og SFHR og áttum við gott og gagnlegt spjall eins og alltaf. 
• Í byrjun ágúst hitti ég nýnema við Háskólagrunn í spjall, sem var dásamleg byrjun á vinnuvikunni eftir sumarfrí.
• Ýmsir innanhússfundir er varða skipulag í byrjun annar, þar á meðal með mannauðsstjóra, nýjum formanni námsráðs, framkvæmdastjóra rekstrar, skrifstofustjóra háskólaskrifstofu, gæðastjóra o.fl. Farið var yfir allskonar málefni eins og húsnæðismál, gervigreind, starfsaðstöðu og fleira.
• Bauð skiptinema velkomna á nýnemadögum erlendra nema sem var 13. ágúst og síðan daginn eftir bauð ég nýnema velkomna á hefðbundnum nýnemadögum.
• Fundur hjá neyðarstjórn HR þar sem við fórum yfir æfingar, sviðmyndir og aðrar viðbragðsáætlanir og stilltum saman strengi fyrir veturinn.
• Fundur með stjórnarmönnum vegna endurskoðunar stefnu nú þegar gildistími hennar er hálfnaður.  
• Fundur þar sem innleiðing og stuðningur við notkum gervigreindar á mismunandi sviðum skólans voru rædd.
• Vinnufundur um ábyrgt alþjóðasamstarf og alþjóðastefnu HR með forstöðukonu alþjóðasviðs, sviðsforsetum, framkvæmdastjóra rekstrar og sviðsstjóra nemendaþjónustusviðs.
• Fyrsti framkvæmdaráðsfundur var haldinn þar sem framgangsnefnd var samþykkt.
• Undirbúningsfundur fyrir fund með Gæðamati háskóla og samstarfsnefnd háskólastigsins.

Ég vona að veturinn verði jafn skemmtilegur og þessar vikur hér í ágúst eftir sumarfrí. Njótum fallegra haustdaga milli anna og gangi okkur öllum vel.

Hlýjar kveðjur,

Ragnhildur.

Júní var fljótur að líða þrátt fyrir annir og marga stóra og skemmtilega viðburði eins og vant er hjá okkur í HR á þessum árstíma. Útskriftir, háskólaráðsfundur og alls konar fundir um lok skólaárs og undirbúning þess næsta einkenndu mánuðinn. Hér kemur það sem dreif á dagana í júní: 

• Útskrift Háskólagrunns fór fram í byrjun mánaðarins þar sem 31 nemandi útskrifaðist, sem var frábært!   Þá voru 25 nemendur skráðir í viðbótarnám til stúdentsprófs nú á vorönn.  
• Brautskráningar fóru fram í Hörpu 20. júní sl. Tvær athafnir fóru fram í Eldborg og var útskrifað af tæknisviði fyrir hádegi og samfélagssviði eftir hádegi. 720 nemendur útskrifuðust og þar af fjórir doktorsnemar. Þetta er alltaf jafn dásamlegur viðburður og þessar brautskráningar voru engar undantekningar! Hér má lesa ávarp mitt í tilefni dagsins.  
• Ný stjórn HR kom saman í fyrsta skipti í júní. Tanya Zharov er nýr formaður stjórnar og tekur við af Guðbjörgu Eddu Eggertsdóttur. Svafa Grönfeldt, prófessor og sviðsstjóri nýsköpunar MITdesignX, kemur ný inn í stjórn HR. Á fundinum var farið yfir stöðu umsókna, uppgjör janúar-apríl og ávöxtun fjár, upplýsingaöryggi og upplýsingatæknimál, áhættumat, starfsáætlun stjórnar og fjármögnun og fjárlög.
• Nýtt háskólaráð kom einnig saman í fyrsta skipti í mánuðinum. Á þeim fundi var farið yfir starfsáætlun 2026 til 2028, samþykkt tillaga um stofnun nýrrar deildar við HR og rætt um stefnu HR til næstu ára og vinnu framundan, námsleiðir í undirbúningi og yfirlit yfir nýjar námsleiðir.
• Ég heimsótti Radboud háskóla í Hollandi þar sem ég sat fundi með rektor og verkefnisstjórum NeurotechEU. Aðalerindi ferðarinnar var þó að sækja fund ESB í Brussel með rektorum háskóla í háskólanetum f.h. NeurotechEU. Þar var rætt um framtíðarfjármögnun, rannsóknir og fjármögnun þeirra o.fl.
• Árlegur fundur um stöðu verkefna og gæðamála með Gæðamati íslenskra háskóla.
• Fundur með rektor Háskóla Íslands og síðar í samstarfsnefnd háskólastigsins, þar sem rætt var um RHnet, háskólastefnu sem er í mótun o.fl.
• Framkvæmdaráðsfundir voru tveir og á þeim fyrri var samþykkt verklagsregla – árleg yfirferð námsleiða og framgangsnefnd.
• Á starfsmannafundi fór Ólafur Eysteinn yfir stöðu rannsókna og ég renndi yfir helstu fréttir frá okkur héðan úr HR, þ.á.m. samþykkt háskólaráðs um að stofna deild taugavísinda og heilbrigðistækni og stöðu umsókna 2026.
• Ég fundaði með nýrri stjórn SFHR.
• Ársfundur Nauthólsvegar 83-85 hses. og Nauthólsvegar 87 hses. fóru fram.
• Rýnifundur var haldinn vegna öryggisatviks hjá Instructure, farið yfir viðbrögð og aðgerðir í HR vegna atviksins.
• Innanhússundirbúningsfundir vegna háskólaráðsfundar og verkefna sem tengjast lokum skólaársins og undirbúningi þess næsta.
• Starfsmannasamtöl fóru fram hér og þar í mánuðinum.
• Sat fund um íslenska stjórnskipun, ESB og fleiri málefni með hópi gesta á vegum fyrrverandi doktorsnema.
• Fundur með hönnuðum vegna viðbyggingar.

Nú taka við vonandi aðeins rólegri sumardagar hjá okkur í HR. Ég hlakka til að njóta útiveru, samveru með fjölskyldu og vinum og ef til vill að hnýta lausa enda fyrir næsta vetur. Ég vona að þið hafið það öll sem allra best í sumar.

Hlýjar kveðjur,  Ragnhildur 

Þá er maí liðinn og sumarið framundan. Þessar síðustu vikur hafa verið viðburðarríkar og skemmtilegar. Við tókumst á við smá áskorun þegar tölvufyrirtækið Instructure, sem rekur Canvas, tilkynnti um alvarlegt öryggisatvik. Canvas er notað í fjölmörgum menntastofnunum um allan heim, þ.m.t. í öllum háskólum á Íslandi. Þá voru fundir og ferðalög á sínum stað og auðvitað fullt af skemmtilegum viðburðum hér innanhúss. Hér kemur það sem helst bar til tíðinda í maí:  

• Við stjórnendur hittum fulltrúa af listum Framsóknar, Flokks fólksins, Miðflokksins, Sósíalistaflokksins og Pírata á fundum hér í HR og ræddum m.a. þau mál sem snerta HR þegar kemur að borgarmálunum.  
• HR náði fyrstu  markmiðum Grænfánaverkefnisins á dögunum og var því Grænfáninn dreginn að húni í fyrsta sinn við hátíðlega athöfn hér í byrjun maí. Fulltrúar frá Landvernd afhentu fulltrúum SFHR fánann og að því loknu fórum við starfsfólk og nemendur út að plokka í kringum skólann og það var þarft, fullt af rusli leyndist í skóginum hérna í kringum skólann!  
• Ég fékk að halda opnunarávarp á ráðstefnu sem bar yfirskriftina: „Lög og tækni – bilið brúað: Djúpfölsun, hlutdrægni og mismunun“, sem haldin var á vegum laga- og tölvunarfræðideildar í byrjun mánaðarins. Ávarpið er undir “útgefið efni” hér á heimasíðunni. 
• Við héldum nær daglega stöðufundi vegna öryggisatviksins hjá Canvas og Instructure, hópurinn sem hittist var af ýmsum sviðum; UT, kennsluþróun, prófasviði, nemendaþjónustu, mannauði, samskiptum, persónuverndarfulltrúa og stjórnendum skólans. Fundirnir gengu út á að taka stöðuna , fylgjast með þróun mála og veita nemendum og kennurum upplýsingar um leið og þær lágu fyrir.  
• Varði nokkrum dögum í Stokkhólmi þar sem ég sótti General Assembly and Innovation ráðstefnu NeurotechEU í Karolinska Instituttet. Rektorar skólanna í NeurotechEU funduðu tvisvar og þau samtöl voru gagnleg og skemmtileg eins og alltaf.  
• Lok annarinnar og verkefni sem gott er að ljúka fyrir nýtt skólaár settu svip sinn á maí svo fundað var m.a. um gæðamál, stofnun nýrrar deildar, nýjar námsbrautir, húsnæðismál o.fl. 
• Á starfsmannafundi fór Bryndís Björk Ásgeirsdóttir, sviðsforseti samfélagssviðs, yfir helstu fréttir af kennslu og námi, eins og stöðu umsókna, nýjar námslínur í haust, tölvukerfi fyrir próf, stöðu kennsluskrár og SIS kerfi og stefnumótun þegar kemur að gervigreind og þá fræðslu til nemenda og kennara. Ég tók seinni hlutann og fór yfir helstu atriði könnunar á viðhorfi stjórnenda til HR, ræddi nýja deild (og mögulega svið) og hið stórskemmtilega verkefni: Einn HR.  
• Á framkvæmdaráðsfundi voru ýmis mál kynnt, s.s. nýjar námsleiðir til skoðunar, gervigreindarkynning og fyrirkomulag með rannsóknamat.   
• Allir rektorar háskóla funduðu með úttektarnefnd á Gæðamati háskóla 
• Ársfundur var hjá UT (Annual Management Review Meeting) en reglulegir ársfundir eru þáttur í undirbúningi fyrir ISO 27001 vottun. 
• Vinnufundur deildarforseta var haldinn núna í lok mánaðar þar sem var rætt um stefnu deildanna, aðkallandi verkefni næstu missera, húsnæðismál og ýmis mál. 
• Í lok mánaðarins fundaði ég með Loga Einarssyni menningar-, nýsköpunar- og háskólaráðherra og sagði þá frá helstu þróun mála í HR þetta skólaár. 
• Stelpur, stálp og tækni og Strákar og stálp í háskóla fór fram nú í lok maí. Þetta eru alltaf ægilega skemmtilegir dagar – orkan í húsinu er engu lík!  

Takk öll fyrir afrekin í maí - þetta er mikill uppskeru og moksturmánuður! Nú er júní framundan og nokkrar vikur eftir þar til fer að róast hjá okkur. Njótið tímans þangað til! 

Hlýjar kveðjur,  Ragnhildur 

Apríl var annasamur og skemmtilegur. Það var mikið af stórum viðburðum, m.a. árshátíð starfsfólks sem var í einu orði sagt frábær! Við héldum líka nokkra stóra fundi: Aðalfundur HR fór fram í lok apríl og einnig stjórnarfundir og aðalfundir Grunnstoðar (fasteignafélagsins), Bakhjarla (sem halda utan um sjóðina) og NV-félaga (sem reka garðana). Við erum síðan byrjuð að bjóða fulltrúum á framboðslistum til borgarstjórnarkosninganna í heimsókn í skólann. Í þeim heimsóknum göngum um húsið með fulltrúunum og setjumst síðan niður og spjöllum um málefni sem tengjast skólanum í tengslum við borgarmálin. Og einhversstaðar inni á milli voru páskar!

En hér kemur það helsta síðan í apríl:  

• Stjórnendum innan HR var boðið upp á námskeið Opna háskólanum í apríl. Námskeiðaröðin er ætluð öllum stjórnendum innan HR með mannaforráð, bæði nýjum stjórnendum sem og þeim sem vilja rifja upp og styrkja þekkingu sína.  

• Á reglulegum stjórnarfundi voru ársreikningar samþykktir, farið yfir skýrslu endurskoðenda og úttekt á stjórnarháttum. Þá var aðalfundur undirbúinn og samþykktar tillögur til hans. Undir önnur mál var rætt um undirbúning að stofnun nýrrar deildar, nýtingu Háskólagarða, könnun á viðhorfi stjórnenda til HR og um fjárfestingastefnu og upplýsingaöryggi.  

• Ég undirritaði fyrir hönd HR samstarfssamning við Festi um verkefnið Strákar og stálp í háskóla. Festi er nýr bakhjarl verkefnisins ásamt JBT Marel sem kom að stofnun verkefnisins með HR og styður enn myndarlega við það.  

• Á framkvæmdaráðsfundum var meðal annars farið yfir helstu tölur í ársreikningum og staðfest að reglur um innviðasjóð hafi verið samþykktar á milli funda.  

• Starfsmannafundur var helgaður fjármálum, ég fór yfir ársreikning og fjárhagsáætlun og ég náði held ég að slútta honum á innan við tuttugu mínútur sem er met! 

• Fulltrúar af framboðslistum Samfylkingar, Sjálfstæðisflokks og Vinstrisins komu til okkar síðustu vikurnar. Þær heimsóknir hafa verið gagnlegar og umræður góðar.    

• Ég fundaði með Erik Vilstrup Lorenzen, sendiherra Danmerkur á Íslandi. Gunnar Þór Pétursson, deildarforseti lagadeildar, sat einnig fundinn og ræddum við m.a. ESB mál og önnur mál er varða alþjóðasviðið um þessar mundir.   

• Vinnufundur forstöðumanna fór fram í Hveragerði. Það var gott að komast aðeins frá og eiga góða stund saman og fara yfir framtíðarsýn eininga og hvar við getum unnið enn betur saman. 

• Aðalfundur HR fór fram 29. apríl. Aðalfundir eru jafnan hefðbundnir en þetta var síðasti aðalfundur Guðbjargar Eddu Eggertsdóttur, stjórnarformanns HR sem nú lætur af störfum. Hún flutti skýrslu stjórnar og framkvæmdastjóra um hag félagsins, starfsemina undanfarið og framtíðaráform. Kosið var til stjórnar HR og háskólaráðs og eftir að hefðbundnum fundi var slitið hlýddum við á erindi Stefáns Ólafssonar, lektors við tölvunarfræðideild um gervigreind í HR og örsögur um um stafræna heilbrigðistækni sem varð að veruleika​ eftir Önnu Sigríði Islind, prófessor við tölvunarfræðideild. Þá var ársskýrslu HR fyrir 2025 dreift á fundinum.  

• Stjórn Námssjóðs sameinaðra verktaka fundaði, en þar var á dagskrá fjárhagsstaða sjóðsins, ársreikningur til samþykktar og rætt var um úthlutanir úr sjóðnum í vor.  

Eins og sést þá einkenndu ársreikningar og aðalfundir vikurnar í apríl. Það er ánægjulegt að sjá þegar litið er yfir sviðið hvað starfið gengur vel og reksturinn er stöðugur og góður. Ég vona að vorið sé að fara vel með ykkur öll og sumarið verður síðan komið áður en við vitum af!  

Hlýjar kveðjur,  

Ragnhildur  

Veturinn kom loksins í mars og gladdi okkur skíðafólkið með snjó og okkur öll með sólardögum inni á milli. Dagskráin hefur verið hefðbundin en þétt eins og oft á vorin en hér kemur það helsta :

• Á framkvæmdaráðsfundum, sem voru þrír í þessum mánuði, voru ýmsar verklagsreglur sem skýrsla Gæðaráðs kallar á, sem og erindisbréf gæðaráðs samþykkt.

• Í byrjun mánaðarins sat ég Iðnþing, ársfund Samtaka iðnaðarins. 

• Þónokkrir fundir voru haldnir vegna húsnæðismála og uppbyggingu á húsnæði HR og Borgarlínu.

• Á forstöðumannnafundi var fjallað um gæðamál og farið yfir verkefnin sem framundan eru. Þá var einnig farið yfir öryggismál og gervigreindarumhverfið okkar hér í HR.

• Stjórnarfundur var fremur hefðbundinn, farið var yfir öryggismál, bráðabirgðauppgjör fyrir 2025, tölvuöryggi, áhættumat, húsnæðismál, samþykktir, skipulag og starfsreglur, tillögu að starfskjarastefnu og undirbúning háskólaráðsfundar í maí.

• Sat fund með stjórn Gæðamats íslenskra háskóla, en samkvæmt handbók þeirra skal fara fram samráðsfundur eftir hverja úttekt þar sem farið er yfir ferlið. Fundurinn var gagnlegur og við áttum opinskátt samtal um ferlið, kosti og þess og galla.

• Til stóð að ég opnaði ráðstefnu sem haldin var í samstarfi HR, Opna háskólans, CADIA, rannsóknarmiðstöðvar HR á sviði gervigreindar, gagnavísinda og snjallkerfa og EDIH Iceland. Ég var því miður lasin en Ólafur Eysteinn leysti mig af. Ráðstefnan fjallaði um gervigreind og var yfirskriftin: AI and Society: You, Data, and Sovereign Decision-Making.

• Á starfsmannafundi var farið yfir úthlutanir úr Rannís og úthlutanir úr rannsóknasjóði hjá okkur, heimasíða nýsköpunar og sprota kynnt og farið yfir kennsluþróun. Þá fengum við yfirferð á gæðamálum og helstu verkefni sem eru framundan þar og í lokin stutta yfirferð um vinnu í tengslum við gervigreind.

• Reglulegur hádegisverðarfundur með stjórn SFHR var góður. Það er alltaf margt að ræða, m.a. gekk árshátíð frábærlega og nú styttist í kosningar til stjórnar SFHR.

• EFMD gæðaúttekt á grunnnámi viðskipta- og hagfræðideildar HR fór fram.

• Í síðustu könnun Maskínu var kannaður hugur atvinnurekenda til HR og útskrifaðra nemenda. Við fengum fyrstu kynningu á niðurstöðum í vikunni.

• Neyðarstjórn HR hittist og fór yfir viðbrögð skólans vegna óveðurs og efnaslyss. 

• Tveir kynningarfundir voru haldnir vegna framkvæmda við Borgarlínu við HR og Nauthólsveg. Ég er glöð hve margir mættu og spurðu, en til lengri tíma er þetta afskaplega spennandi mál fyrir okkur hér.

• Þessar vikurnar fer dágóður tími í að vinna efni fyrir ársskýrslu HR, ársreikning og skýrslu stjórnar. Í þessari vinnu gefst okkur gott tækifæri til að fara vel yfir 2025 og sjá á svörtu og hvítu hve mikið er gert hjá okkur á hverju ári. Við fáum yfirsýn yfir ávinninga, áskoranir og einnig allskonar upplýsingar sem gefa góða sýn í störf okkar. Þið hafið mörg komið að þessari vinnu við að safna saman upplýsingum og mig langar til að þakka kærlega fyrir það!

Við fengum aldeilis veðurhvell í lok mánaðarins en við urðum við fyrirmælum yfirvalda að hvetja fólk ekki út í veðrið meðan það var sem verst. Bestu þakkir fyrir skjót viðbrögð og sem betur fer fór allt vel og veðrið var fljótt að ganga niður. Mig langar að lokum að óska ykkur öllum gleðilegra páska og ég vona að þið hafið það gott með ykkar fólki.

Hlýjar kveðjur,

Ragnhildur.

Í febrúar voru hefðbundnir fundir á dagskrá en líka ýmislegt annað eins og kveðjuhóf fyrir starfsmenn sem láta af störfum vegna aldurs og afar gagnleg vinnustofa fyrir viðbragðshóp og neyðarstjórn HR, að ógleymdum bolludeginum sem haldinn var hátíðlegur hér í húsi eins og ávallt. Hér kemur það helsta í febrúar, þó seint sé!  

• Framkvæmdaráðsfundir: Verklagsregla um stofnun nýrra námsleiða og örnáms var samþykkt, sömuleiðis verklagsregla um kennsluskrá, verklagsregla um endurskoðun námsleiða og erindisbréf gæðaráðs.  

• Eins og tilkynnt var með pósti, var slökkviliðið kallað út í HR vegna efnaleka í efnafræðistofu skólans. Lekinn átti sér stað við vinnu með hvarfgjörn efni þegar slokknaði á útsogi í efnaskáp með þeim afleiðingum að efni bárust í litlum mæli út í stofuna. Sá sem var að störfum hringdi um leið í neyðarlínuna og sáu öryggisvörður á vakt og síðar slökkvilið um að rýma húsið. Við mælingar slökkviliðs á mengunarstigi kom hvorki í ljós mengun í efnafræðistofunni né í nærliggjandi stofum. Að lokinni mælingu var fólki hleypt aftur inn í skólann. Sá sem var að störfum fór á slysadeild til eftirlits. Öryggisnefnd o.fl. hafa síðan fylgt málinu eftir. Ég er afar þakklát fyrir snör viðbrögð þess sem var að störfum og fyrir viðbragðsaðila sem brugðust skjótt við og tryggðu öryggi starfsfólks og nemenda. 

• NTEU stýrihópsfundur var haldinn í febrúar, eins og alla mánuði. Þar eru spennandi hlutir í farvatninu.  

• Forsetalistaathöfn fór fram í febrúar þar sem nemendur tóku á móti viðurkenningum fyrir frábæran námsárangur. Að þessu sinni voru það 63 nemendur sem komust á forsetalista og tveir nemendur sem tóku á móti námsstyrk Háskólagrunns og það er ástæða til að óska þeim enn og aftur til hamingju!  

• Starfsmannafundur var haldinn í byrjun febrúar þar sem farið var yfir fjárhagsáætlun fyrir 2026, niðurstöður vinnufundar starfsfólks um stefnu og stofnanaúttekt Gæðamats íslenskra háskóla og stóru verkefni ársins.  

• Fundur vegna gervigreindarlausnar í háskólum með fulltrúum menningar-, nýsköpunar- og háskólaráðuneytis. 

• Menntadagur atvinnulífsins á Reykjavík Hilton Nordica. Viðburðurinn er samstarfsverkefni Samorku, Samtaka ferðaþjónustunnar, Samtaka fjármálafyrirtækja, Samtaka fyrirtækja í sjávarútvegi, Samtaka iðnaðarins, Samtaka verslunar og þjónustu og Samtaka atvinnulífsins. 

• Stjórnarfundur fór fram um miðjan mánuðinn þar sem á dagskrá voru fjármál, upplýsingatæknimál, starfsmanna- og jafnréttismál, mat á störfum stjórnar og stjórnenda, úttekt á stjórnarháttum, yfirlýsing um stjórnarhætti og skriflegt mat á óhæði stjórnar.   

• Kveðjuhóf var haldið fyrir þrjá starfsmenn sem létu af störfum vegna aldurs en það eru þau Anna Ingólfsdóttir, prófessor við tölvunarfræðideild, Gísli Freyr Þorsteinsson, umsjónarmaður vélaverkstæðis við verkfræðideild og Kristján Kristjánsson, forstöðumaður rannsóknarþjónustu. Við söknum þeirra mörg. 

• Sat vinnustofu fyrir viðbragðshóp og neyðarstjórn HR þar sem fjallað var um stjórnkerfið í neyðaraðgerðum og almannavarnarkerfið. Þá var einnig farið í gegnum nokkur atvik þar sem við skerptum á verkferlum og áætlunum hjá okkur í HR.  

Önnin þýtur hjá og það er nóg að gera hjá okkur öllum og mun eitthvað þyngjast frekar þegar vorið nálgast. Njótið hækkandi sólar og ekki hika við að hóa ef ástæða er til. 

Hlýjar kveðjur,  

Ragnhildur. 

Þá er janúar lokið og það hefur verið mikið um að vera hjá okkur eins og alltaf á þessum árstíma. Og svo gleður alltaf að birtan eykst dag frá degi. Hér kemur það helsta frá janúar, en helstu verkefni ársins framundan og niðurstöður vinnufundar starfsmanna í desember voru kynnt á starfsmannafundi í vikunni. 

• Samstarfsnefnd háskólastigsins kom saman um miðjan mánuðinn og ræddi fjármál o.fl.  

• Á stjórnarfundi var farið yfir lagabreytingar sem varða starfsemina, ávöxtun fjár, tölvuöryggi, innra eftirlit, stjórnskipulag og að lokum var háskólaráðsfundur undirbúinn.   

• Fundur háskólaráðs var haldinn 23. janúar og á dagskrá var helst: Fréttir frá skólanum, ​lykilatriði starfs- og rekstraráætlunar 2026​, gæðamál og niðurstöður úttekta, ​sýn, stefna, lykilverkefni og mælingar á árangri​. Að lokum fóru fram umræður um menntunar- og færniþörf til framtíðar horft 10 til 15 ár fram í tímann. ​ 

• Framkvæmdaráðsfundir voru haldnir 6. og 20. janúar. Á fundinum 6. janúar voru eftirfarandi samþykktir: Reglur um sérúrræði, ný námslína í hönnunar- og vörutæknifræði, vísindasiðanefnd HR-RUEC og reglur um rannsóknareikninga. Á fundinum 20. janúar voru eftirfarandi samþykktir: Sameiginlegar þverfaglegar námslínur, og að birta ársskýrslu hugverkaráðs á vef HR.  

• Ég tók á móti gestum á opnunarhátíð Sparksins 2026 sem er á vegum Fyrirtækjasmiðju Ungra frumkvöðla JA Iceland. 

• Nýársboð á Bessastöðum sem haldið var 6. janúar sl. var hátíðlegt eins og alltaf.  

• Forseti Íslands afhenti einnig Nýsköpunarverðlaun en eitt af sex verkefnum sem komust í úrslit var úr heilbrigðisverkfræðinni - samsett nemum úr HR og HÍ. Til lukku með það. 

• Ég var ein þriggja háskólarektora sem fundaði með nefnd um atvinnustefnu og kom sjónarmiðum háskólanna á framfæri. 

• Innanhússfundir vegna mannauðs- og gæðamála, einnig stöðufundir og aðrir fundir, m.a. fundur vegna stofnanastrúktúrs NTEU en það er aðeins flókið að leysa úr því hvar námsleiðir á vegum netsins eigi heima innan skólans.  

• Mánaðarlegur fundur forstöðumanna var haldinn og þar var rætt um fjármál, launamál og helstu verkefni.  

• Ég sat skyndihjálparnámskeið á vegum Rauða kross Íslands sem var í boði fyrir allt starfsfólk HR. Markmiðið er að maður öðlist öryggi, færni og þekkingu til að veita aðstoð í bráðatilfellum með einföldum og öruggum aðferðum. Ég sé ekki eftir þessum fjórum klukkustundum sem námskeiðið tók og hvet öll að fara á eitt slíkt! 

• Nýnemadagar skiptinema fóru fram í byrjun janúar þar sem starfsemi skólans var kynnt og farið með þá í skoðunarferð um húsið. Þá fengu þeir einnig hraðnámskeið í íslensku og fyrirlestur frá Umhverfisstofnun um umhverfisvænan lífstíl á Íslandi. 

• Framadagar fóru fram 20.-22. janúar þar sem fyrirtæki kynntu starfsemi sína og hittu gesti og gangandi en aldrei hafa fleiri fyrirtæki tekið þátt eða 61 talsins. Dagskráin náði hámarki 22. janúar þegar Halla Tómasdóttir, forseti Íslands, heimsótti skólann og hitti nemendur í sófaspjalli þar sem hún ræddi leiðtogahlutverkið og hvað það þýðir að vera leiðtogi.  

• Brautskráning fór fram á síðasta degi janúar í Hörpu. Ég óska öllum útskriftarnemum hjartanlega til hamingju með áfangann! 

Ég held ég geti með sanni sagt að 2026 byrji með rokki og róli! Það er gaman að finna samtakamáttinn í upphafi árs þegar kemur að verkefnum okkar, takk fyrir ykkur!  

Hlýjar kveðjur,  

Ragnhildur 

Þó að desember sé kannski helst til annasamur hér í HR þá er hann sem betur fer líka hátíðlegur. Kennsla, próf, fundir og fjölbreyttir viðburðir og málþing eru ofarlega á blaði nú í desember en hér er það helsta frá mér:  

• Vinnufundur starfsfólks um stefnu HR var haldinn nú í byrjun desember. Fundurinn var mjög góður og gagnlegur og umræður hnitmiðaðar og skiluðu góðum ábendingum og efnivið sem við tökum nú áfram og vinnum úr.  

• Ég hitti framkvæmdaráð og stjórn Viðskiptaráðs á fundi þar sem ég fór vítt og breitt yfir sviðið varðandi starfsemi HR. Ég ræddi sérstöðu skólans, sérstaklega það sem snýr að námi og rannsóknum, stöðu skólans í alþjóðlegu samhengi, stefnuna og framtíðarhorfur. Síðan tóku við skemmtilegar og uppbyggilegar umræður.  

• 1. desember var 15 manna hópi, þmt stjórn SFHR, boðið á Bessastaði þar sem Halla Tómasdóttir, forseti Íslands tók á móti okkur og ræddi m.a. um gervigreind og mennskuna. Það var gaman og nemendurnir tiltóku þetta á síðasta samráðsfundi ársins sem einn af hápunktum þess. 

• Ég ákvað að fresta mánaðarlega starfsmannafundi okkar sem átti að fara fram 16. desember þar sem aðalefni fundarins lágu ekki fyrir og daginn eftir, eða 17. desember, þá var jólahádegi og HR verðlaunin á dagskrá í Olympus.  

• Og talandi um HR verðlaunin! Hjartans hamingjuóskir til verðlaunahafanna í ár en þau eru: Anna Lára Gísladóttir, Yngvi Björnsson og Jón Friðrik Sigurðsson.  

• Fjárhagsáætlunarvinna kláraðist svo og plan fyrir næsta ár liggur fyrir. 

• Á framkvæmdaráðsfundi voru eftirfarandi samþykktir: Frostbyte, nýtt rannsóknasetur við tölvunarfræðideild, nafnabreyting Háskólagrunnur og mat nemenda  á námskeiðum.   

• Stjórnarfundi, sem átti að fara fram um miðjan mánuðinn, var frestað en fyrir liggur að samþykkja starfs- og rekstraráætlun 2026.  

• Afmælismálþing verkfræðideildar var afar vel heppnað en nokkrir af helstu rannsakendum og kennurum deildarinnar kynntu þar rannsóknir sínar í tilefni af 20 ára afmælinu. 

• Ég átti fund með Þorgerði Katrínu Gunnarsdóttur utanríkisráðherra og Silju Báru R. Ómarsdóttur, rektor Háskóla Íslands um samstarf við uppbyggingu sérþekkingar á málefnasviðum þróunarsamvinnu. Á fundinum skrifuðum við undir samning um samstarf um styrkveitingar frá utanríkisráðuneytinu til rannsóknarverkefna við að byggja upp tengsl við háskóla í Afríku sunnan Sahara og styrkja þannig þekkingu á málefnasviðum alþjóðlegrar þróunarsamvinnu hérlendis.  

• Nú í vikunni barst mér svo bréf Persónuverndar þar sem frumkvæðisathugun hennar í tilefni af tölvuárásinni var lokið með áminningu og lista af úrbótum sem hún telur nauðsynlegar.  

Ég vona að þið hafið það öll gott yfir hátíðirnar og að þið náið góðri samverustund með fjölskyldu og vinum, borðið góðan mat og náið að hvíla ykkur eftir önnina. Þið megið öll vera stolt af ykkar verkefnum og vinnuframlagi á árinu sem nú er að líða.  

Gleðileg jól og hjartans þakkir fyrir árið,  samstarfið og skemmtunina! Við gerðum vel. Ég hlakka til næsta árs.  

Ragnhildur 

Nóvember leið hratt! Hefðbundnir fundir, ferðalög vegna alþjóðlegs samstarfs og reglubundnir fundir einkenndu mánuðinn sem og kennslulok og jólahlaðborð HR, sem var yndislegt. Hér er yfirlit yfir eitt og annað sem gekk á:

• Prófatímabili 12 vikna annar lauk á dögunum. Á prófatímabili er gjarnan mikið álag á nemendum og starfsfólki og nú eftir þessa prófatörn verða kerfin sem stuðst er við endurmetin með það að markmiði að laga hnökra.  

• Kennslan gengur vel og nú þegar próf standa yfir þá óska ég mínum nemendum, og auðvitað öllum nemendum okkar, góðs gengis þessar vikurnar. 

• Við Daði Már Kristófersson, fjármála- og efnahagsráðherra og Helgi Gunnarsson, formaður Verkfræðingafélags Íslands skrifuðum undir samning um nýjan samráðsvettvang um verkefnastjórnsýslu og opinberar fjárfestingar. Tilgangurinn með samningnum er að efla samstarf milli fjármálaráðuneytisins, HR og Verkfræðingafélagsins á þessu sviði, stuðla að þróun bestu starfsvenja í stjórnsýslu, tengja saman þekkingu og draga fram bestu aðferðir. Helgi Þór Ingason leiðir þetta f.h. HR. 

• Stjórnarfundur var haldinn í lok mánaðarins þar sem á dagskrá voru fjármál, tölvuöryggi, gæðamál, starfsreglur stjórnar, hagsmunaskráning, alþjóðleg staða HR og starfs- og rekstraráætlun 2026.  

• Háskólaskrifstofan var með opið hús þar sem starfsfólk gat litið við og fengið tækifæri til að kynna sér starfsemina nánar!  

• Á mánaðarlegum framkvæmdaráðsfundi voru viðmið er varða gervigreind samþykkt.  

• Vinnudagur deildarforseta var haldinn í lok mánaðar þar sem var farið yfir önnina og gæðamál. Fínustu umræður urðu um húsnæðismál, mikilvægi þess að nemendur og kennarar séu á staðnum o.fl.  

• Háskólaráð kom saman nú í nóvember. Á fundunum sem eru haldnir þrisvar til fjórum sinnum á ári fara fram umræður um stefnumótun háskólans um nám, kennslu, rannsóknir og gæði, sem og tengsl háskólans og atvinnulífsins. Nú dögunum ræddum við HR í alþjóðlegu samhengi, stöðu skólans á alþjóðlegum mælikvörðum og samstarf til þekkingaröflunar og tenginga. Þetta voru, að vanda góðar og gagnlegar umræður. Deildarforsetar sitja þessa fundi og málin voru rædd í hópum eftir fagáhuga, sem var góð tilbreyting. 

• Samstarfsnefnd háskólastigsins kom saman á fundi í mánuðinum. Það er bæði nauðsynlegt og ekki síður ánægjulegt að hitta alla rektora háskólana hér á landi enda er þetta samráðs og samstarfsvettangur háskóla á Íslandi. Á fundinum ræddum við endurskoðun reiknilíkans háskólanna. Við sendum svo inn sameiginlegt bréf með óskum um tilteknar breytingar sem allir háskólar eru sammála um að væru til bóta. 

• Því tengt sendum við inn umsögn HR eins um reiknilíkanið og reynsluna af því.  

• Starfsmannafundur var með jólalegu yfirbragði en fyrri hluta fundar fór ég yfir markmið með vinnustofu starfsmanna 2. desember þar sem við fórum yfir stefnuna okkar og þær áherslur sem okkur fannst mest áríðandi og eins skoðuðum hvaða áherslur eiga mögulega ekki við lengur. Í lokin fóru þær Rakel Gunnarsdóttir og Katrín Rut Bessadóttir yfir jóladagskrá HR sem fór á fullt nú í lok nóvember og nær hámarki um miðjan desember. Nánari upplýsingar um hana má finna á Orion. 

• Menningar- nýsköpunar- og háskólaráðuneytið er að skoða rannsóknainnviði í landinu í heild og var ég og aðrir fulltrúar úr stjórnendaliði HR kölluð til samráðs um það um miðjan mánuðinn.  

• Jólahlaðboð HR fór fram í Gullhömrum og það var svo gaman og gott að stíga aðeins út úr húsi með vinnufélögunum og borða góðan mat saman í jólalegu umhverfi.  Hjartans þakkir fyrir samveruna og til þeirra sem skipulögðu. 

• Í byrjun nóvember fór fram aðalfundur hjá NeurotechEU og fundir rektora í netinu. Rætt um framhaldið, mögulega stækkun netsins og glaðst yfir þróun sameiginlegrar námslínu. 

• Um miðjan mánuð tók ég þátt í vinnustofu í Kaupmannahöfn um þróun þrískiptingar ríkisvaldsins með síauknu alþjóðasamstarfi. 

•  12.-13. nóvember sótti ég fund í European Research Advisory Council Nature Springer útgáfunnar. Það var verulega fræðandi og skemmtilegt og ég miðlaði sjónarmiðum vísinda á Íslandi og Norðurlöndum eins og ég best gat. 

• Vinna við fjárhagsáætlun 2026 er í gangi – fyrstu drög voru samþykkt af stjórn í lok mánaðarins og svo fer áætlunin fullbúin fyrir stjórnina um miðjan desember. 

Ég vona að aðventan verði ykkur góð og þið náið að hafa það huggulegt inn á milli álagspunkta í vinnunni. Það gerir hver með sínu nefi, sumir fara á jólatónleika, aðrir missa sig í skreytingum og baka kannski fjórtán sortir og enn aðrir gera bara eitthvað allt annað eins og að far út að hlaupa í hálkunni. En hvað sem það er þá vona ég að þið hafið það sem allra best og ykkur gangi öllum vel í verkefnum ykkar á næstu vikum. Við erum að lenda árinu - og það vel! 

Hlýjar kveðjur,  Ragnhildur. 

Október var uppfullur af fjölbreyttum viðburðum og fundum. Við höldum áfram að taka á móti gestum úr öllum áttum og það er alltaf jafn gaman að sýna fólki sem heimsækir okkur hvað nemendur og kennarar eruð að fást við þegar kemur að vísindarannsóknum og öðrum verkefnum. Margir hefðbundnir fundir voru haldnir og svo var útskrift sem var sérlega skemmtileg; hamingjuóskir til útskriftarnema og ykkar allra með þau!
Konur og kvár fjölmenntu á Arnarhól í tilefni af Kvennafrídeginum og ég var ein af mörgum úr HR sem ekki var í vinnu. Tvær vísindakonur frá HR hlutu Norræn verðlaun og síðan er það ekki á hverjum degi sem starfsmaður skólans fær orðuna: Knight of the Order of the Star of Italy. Loks fór draugur á stjá á hrekkjavökunni hér í húsi.

Hér kemur það helsta frá október:

• Kennslan gengur vel og nemendurnir skemmtilegir og fróðleiksfúsir.
• Á framkvæmdaráðsfundi var samþykkt að halda áfram vinnu við NeurotechEU námslínuna og á sama tíma verði unnar verklagsreglur er taka til námslína í alþjóðlegu samstarfi. Einnig var samþykkt framgangsnefnd.
• Við fengum heimsókn frá Aleksander Kropiwnicki sendiherra Póllands og Sława Duszyńska og Anastazja Glogowska, fulltrúum sendiráðsins. Við litum inn til Slawomir Marcien Koziel, prófessors í verkfræðideild, og fórum síðan yfir starfsemi HR og spjölluðum meðal annars um tengingu HR við pólska samfélagið á Íslandi og samstarfssamninga HR við háskóla í Póllandi.
• Í tengslum við Arctic Circle fengum við líka heimsókn frá fulltrúum bandaríska háskólans University of Southern Maine. Tilgangur heimsóknarinnar var að styrkja enn frekar tengslin á milli skólanna en samstarfssamningur er á milli skólanna um skiptinám nemenda og sigurvegarar Vitans fara þangað í heimsókn.
• Lagadagurinn var haldinn í mánuðinum þar sem ég hélt erindi sem fjallaði um hvaða öryggisventla stjórnarskrá Íslands hefur þegar kemur að andstöðu við grundvallarþætti lýðræðisins. Ég fór yfir hvaða afmörkun eða temprun valds er til staðar í íslenskri stjórnskipun sem takmarkar getu ólýðræðislegra afla til að sanka að sér völdum og einnig hvaða veikleikar auka hættu á misnotkun og færslu í ólýðræðislegar áttir þegar kemur að íslenskri stjórnskipun. Ef þið hafið áhuga þá er textinn hér: Erindi rekotors - Lagadagurinn 10. oktober 2025 (PDF)
• Haldinn var vinnufundur þar sem rædd var framtíðarsýn fyrir Neurotech í HR. Það er nauðsynlegt að hugsa hvernig þetta stóra og skemmtilega verkefni – sem við samþykktum einróma að fara inn í - fellur inn í skólann allan og skipulag hans og meta hvort og hvernig það nýtist okkur öllum.
• Forstöðumenn hittust á vinnufundi sem var gagnlegur og góður. Við fengum áhugaverðan fyrirlestur um gervigreind og ræddum einnig í smærri umræðuhópum hvernig við erum að nota stefnu HR í starfinu, hvernig við getum nýtt hana betur og hvað við getum lært hvort af öðru.
• Áhugavert málþing um ávinning og áskoranir íslenskra háskóla í evrópskum háskólanetum fyrir nemendur, starfsfólk, stöðu háskólanna og samfélagið var haldið í Norræna húsinu. Ég sat í pallborði þar sem við ræddum þennan ávinning og áskoranir. Bryndís Björk Ásgeirsdóttir tók einnig þátt í málþinginu og sat í öðru pallborði þar sem tekið var fyrir nýsköpun evrópskra háskólaneta fyrir þróun náms, vísinda og atvinnutækifæra. Þetta var fínt samtal og gaman að sjá hvað bæði netin og ávinningurinn sem skólarnir telja sig hafa af þeim eru mismunandi!
• Þann 24. október voru fimmtíu ár frá upphaflega Kvennafrídeginum og mörg í verkfalli þann dag, þar á meðal ég. Þó margt hafi breyst til batnaðar þá er mikilvægt að sofa ekki á verðinum og berjast af alefli gegn því bakslagi sem við sjáum í jafnréttismálum um allan heim. Það skiptir máli að öll fái að njóta hæfileika sinna og þroska þá og það er nú heldur betur stefna okkar í HR að tryggja að svo sé - m.a. þess vegna bjóðum við stelpum og strákum í heimsókn og ræðum við þau námsval, veitum styrki og reynum eins og við getum að beina fólki í nám sem þroskar það og eflir, sama hvort það er hér eða á sviðum sem við bjóðum ekki upp á.
• Útskrift fór fram í Hörpu síðasta laugardaginn í október. Við útskrifuðum 104 nemendur úr ýmsum deildum. Athöfnin var hátíðleg eins og ávallt þegar við útskrifum nemendur úr HR. Eins og ávallt í október voru flestir að útskrifast úr Viðskipta- og hagfræðideild og flestir (óháð deildum) að útskrifast úr framhaldsnámi.
• Starfsmannafundur fór fram (loksins!) í lok mánaðarins. Farið var yfir þar sem farið var yfir helstu fréttir og reglur um vistun gagna og tölvunotkun voru kynntar. Það er gott að ná að hittast svona í stórum hópi og ekki síst til að ná smá spjalli við fólk sem nær kannski ekki alltaf að hittast daglega hér í okkar stóra húsi! Morgunkaffið, sem mannauður boðar öðru hverju, nýtist reyndar sérstaklega vel í það og sama gilti um Hrekkjavökumorgunkaffið sem starfsfólk lagði saman í föstudagsmorguninn 31.10.
• Stjórnin hittist tvisvar í mánuðinum en annar fundanna var auka fundur sem snerist um fjármál skólans þar sem sérstaklega var farið yfir nýtingu aukafjárveitinga frá ríkinu. Hinn fundurinn var vinnufundur um sýn og stefnu og þar var m.a. tekin staðan á innleiðingu stefnunnar sem samþykkt var í janúar 2024. Sérstaklega var rætt um þá áherslu að vera hreyfiafl í þróun atvinnulífs en líka um þróun námsframboðs.
• Þá er ánægjulegt að segja frá því að þær Anna Sigríður Islind, prófessor við tölvunarfræðideild, og Bridget E. Burger, sérfræðingur hjá rannsóknarþjónstu HR hlutu nýverið Nordic Women in Tech Awards en verðlaunin eru veitt árlega. Anna Sigríður hlaut verðlaunin Liva Echwald Awards, veitt til að heiðra og minnast danska frumkvöðulsins og stofnanda Female Founders of the Future (FFOF), Liva Echwald. Bridget hlaut verðlaun í flokknum Women in Tech Ally, veitt einstaklingum sem hvetja aðra og hafa haft raunveruleg áhrif í sínu samfélagi með því að fjölga konum innan tæknigeirans síðastliðin tvö ár.
• Dr. Paolo Gargiulo, prófessor við verkfræðideild Háskólans í Reykjavík og forstöðumaður heilbrigðistækniseturs HR hlaut riddaratign ítalska ríkisins (Knight of the Order of the Star of Italy)  fyrir framlag sitt til akademísks og vísindalegs samstarfs milli Ítalíu og Íslands við hátíðlega athöfn hér í HR.
• Sjálfbærnidagur HR var haldinn í tilefni alþjóðalega sjálfbærnidagsins sem ber upp síðasta miðvikudag í október ár hvert. Þar var ýmislegt á boðstólum, meðal annars málstofa þar sem sérfræðingar úr háskólanum og atvinnulífinu ræddu helstu skuldbindingar íslenska ríkisins á sviði loftslagsmála með sérstakri áherslu á framlag og ábyrgð fyrirtækja í baráttunni gegn loftslagsvánni. 
• Og gleymum ekki snjódeginum mikla núna í lok mánaðar eða 28. október! Mig langar til að þakka öllu starfsfólki og nemendum fyrir að bregðast við af þolinmæði og yfirvegun þegar röskun varð á starfinu vegna ófærðar. Þá fær Gunnar okkar og fasteignaumsjón eins og hún leggur sig sérstakar þakkir fyrir bæði að salta og standa fyrir utan skólann daginn eftir snjóstorminn mikla og hjálpa ungum OG öldnum yfir klakann sem myndast hafði í óveðrinu. Takk!

Gangi okkur öllum vel að klára önnina - munum að hafa gaman inn á milli anna og nota rólegar stundir til að hlaða batteríin.

Hlýjar kveðjur,
Ragnhildur

September fór hressilega af stað og það er búið að vera nóg um að vera; fundir, stórir og smáir, bæði hér í húsi, á Akureyri og út fyrir landsteinana. Ekki má heldur gleyma skemmtilegum viðburðum. Hér kemur það helsta þennan septembermánuð sem leið allt of hratt!

• Fyrsti stjórnarfundur vetrarins var haldinn í byrjun mánaðarins þar sem við fórum yfir UTmál; áhættumat fyrir skólann; fjármögnun og rekstur skólans fyrstu sex mánuði ársins auk undirbúnings og skipulags vetrarins.
• Ég átti fund með Loga Einarssyni, mennta-, nýsköpunar-, og háskólaráðherra og fulltrúum hans úr ráðuneytinu í tengslum við fjárlögin og svo fundaði hann með öllum rektorum um fjármál og stefnu ráðuneytisins vikuna á eftir. Háskólaskrifstofa ráðuneytisins kom svo í heimsókn og kynnti sér starfsemina, eins og nánar verður lýst hér að neðan.
• Við héldum tvær alveg sérlega skemmtilegar athafnir í fyrra hluta mánaðarins sem voru Forsetalistaathöfn og Nýnemastyrkir og atvinnulífstengdir styrkir. Þar fengu nemendur viðurkenningu fyrir góðan námsárangur en forsetastyrkur felur í sér niðurfellingu hluta skólagjalda og á athöfninni með nýnemum og atvinnulífinu voru veittar viðurkenningar til styrkþega úr atvinnulífstengdum sjóðum og árlegir nýnemastyrkir afhentir. Það var virkilega gaman að fá að taka þátt í þessum athöfnum og fá að fylgjast með nemendum uppskera eftir mikla og góða vinnu.
• Það var gaman að halda norður í land á Súpufund atvinnulífsins sem fór fram í DriftEA á Akureyri 16. september sl. þar sem rætt var um framtíð tæknináms á Norðausturlandi. Um 60 manns mættu á fundinn þar sem rætt var um leiðir til að efla námið og hvernig styðja megi við framtíðaruppbyggingu greinarinnar.
• Það voru Háskólinn á Akureyri og Háskólinn í Reykjavík sem, í samstarfi við Akureyrarbæ og Samtök sveitarfélaga og atvinnuþróunar á Norðurlandi eystra (SSNE), stóðu að fundinum. Ég verð alltaf mjög glöð yfir örlætinu sem fólk sýnir háskólunum og nemendum þeirra með því að gefa af tíma sínum og þekkingu til að tryggja að við vitum hvernig hlutir snúa við þeim.
• Árlegur fundur samstarfsnefndar háskólastigsins með stjórn Gæðamats háskóla fór fram nú í september. Hin árlega ráðstefna Gæðaráðsins fór að þessu sinni fram í LHÍ og þar var umfjöllunarefnið velferð og stuðningur við nemendur. Gréta Matthíasdóttir og Kristján Kristjánsson voru með innlegg ásamt fleirum.
• Kennslan gengur vel og gaman að breyta til í amstri dagsins og tengja við nemendur aftur í gegnum kennsluna.
• Í september voru einnig haldnir fjölmargir vinnufundir, stundum vinnudagar þar sem fundað er og unnið að markmiðum og stefnu skólans. Þá voru líka fjölmargir innanhússfundir sem eru gjarnan skipulagðir með litlum fyrirvara en eru engu að síður gagnlegir og nauðsynlegir.
• Við fengum senda yfirlýsingu og áskorun frá Landssamtökum íslenskra stúdenta, Q- félag hinsegin stúdenta og ERGI – Félag hinsegin stúdenta á Norðurlandi sem lýsa yfir órofa samstöðu með hinsegin stúdentum. Þau fordæma orðræðu og aðgerðir sem grafa undan tilvist, sjálfsvirðingu og öryggi þessa mikilvæga hóps og staðfesta um leið að stúdentahreyfingin stendur með mannréttindum, fjölbreytileika og mannlegri reisn. – Þetta er mikilvæg brýning sem við í HR tökum að sjálfsögðu alvarlega.
• Stúdentafélagið í HR stóð fyrir árlegum Ólympíuleikum SFHR í vikunni. Það var heldur betur gaman að fylgjast með nemendum úr öllum deildum skólans keppa í allskonar óhefðbundnum en mjög skemmtilegum greinum. "The older I get, the better I was” - svo mig langaði oft að taka þátt! En tölvunarfræðin var sigurvegari - þriðja árið í röð.
• Þá var alþjóðadagur HR haldinn hátíðlegur í byrjun september þar sem um 500–700 nemendur og starfsmenn nýttu tækifærið til að kynna sér fjölbreytt alþjóðleg tækifæri.
• Við fengum heimsókn frá skrifstofu háskóla og vísinda úr mennta-, nýsköpunar-, og háskólaráðuneytinu. Það var skemmtilegt að veita þeim innsýn inn í starf og rannsóknir hér í HR og sýna þeim aðstöðuna. Við litum inn til Hannesar Högna Vilhjálmssonar, prófessors við tölvunarfræðideild, og fengum m.a. kynningu á rannsókn á notkun dómsals í sýndarveruleika fyrir þolendur kynferðisofbeldis. Þá kynnti Erna Sif Arnardóttir, dósent við verkfræði- og tölvunarfræðideildir Svefnbyltinguna og framhaldsrannsóknir á svefni.
• Framkvæmdaráð samþykkti að vinnu yrði haldið áfram við þróun tveggja nýrra námsleiða - einnar sameiginlegar NeurotechEU línu og svo einnar í tæknifræði. Sömuleiðis voru samþykktar reglur um tölvunotkun og vistun gagna, sem verða kynntar á næsta starfsmannafundi og í framhaldinu.
• Sprotafyrirtækið Aldin Dynamics var valið Vaxtarsproti ársins sem er viðurkenning fyrir öfluga uppbyggingu sprotafyrirtækis. Thor Ice Chilling Solutions hlaut einnig viðurkenningu fyrir góðan vöxt. Athöfnin fór fram í Grasagarðinum í Laugardal. Við vorum sem betur fer inni í Flórunni á meðan á athöfn stóð enda hellidemba úti. En athöfnin var hátíðleg og í ávarpi mínu talaði ég um að aukinn stuðningur og skýr rammi við nýsköpun innan HR kæmi meðal annars fram í fjölda einkaleyfaferla sem hefur aukist síðustu ár og aukinn fjölda fyrirtækja sem verða til vegna stuðnings skólans. Þá lagði ég líka áherslu á mikilvægi þess að hlúa að því fólki sem kýs að mennta sig á tímum þar sem tækninni fleygir fram og það er sannarlega eitt af okkar helstu markmiðum hér í HR.
• Nú í lok september var haldinn norrænn fundur rektora og voru samankomnir rektorar frá öllum Norðurlöndunum og Eystrasaltsríkjunum. Þessi fundir eru gagnlegir; það er rætt saman í litlum hópum og mikilli einlægni. Meðal þess sem kom fram var m.a. að víða væri fólk í vanda með samstarf við háskóla og háskólafólk í ríkjum sem ekki eru efst á vinsældalistanum pólitískt - eða jafnvel beinlínis talin hættuleg eins og Rússland er í Eystrasaltslöndunum. Annað var áhrif COVID á háskólana og fjöldi erlendra nema, en þeir skólar sem lengst hafa gengið í inntöku þeirra hafa verið að fá á sig pólitíska brotsjói í heimalöndunum. Loks fór heilmikill tími í að ræða heimsmálin og stöðu háskóla vestanhafs og annars staðar.

Ég biðst afsökunar á því að það hefur ekki verið starfsmannafundur nú í september. Það voru svo miklar sveiflur með fjárlagafrumvarp, möguleg lok á gæðaúttekt o.fl. að ég byrjaði að bíða eftir slíku og þá dróst fundurinn úr hömlu. Við hittumst kát nú í október!

Annars vona ég bara að skólaárið leggist vel í ykkur öll og september hafi eins gengið vel hjá ykkur líka. Munum að flýta okkur hægt nú þegar fer að dimma á morgnana og kólna!

Hlýjar kveðjur,

Ragnhildur

Komið þið sæl,

ágúst er alltaf líflegur og það er heldur betur búið að vera fjör hérna í húsi nú þegar allt er komið á fullt í kennslunni. Ný önn, fundir og undirbúningur fyrir komandi vetur einkenna síðustu vikur og ég er full tilhlökkunar og vonandi þið líka. Hér má sjá sitthvað sem hefur verið í gangi í ágúst:

• Nýnemar í háskólagrunni mættu strax eftir verslunarmannahelgi og aðrir týndust inn smátt og smátt. Kennsla hófst 18. ágúst og nú iðar allt af lífi. Nýnemar eru um 1500 og skiptinemar 127 talsins.
• Tveir framkvæmdaráðsfundir voru haldnir nú í ágúst þar sem við ræddum meðal annars um hvernig skuli haldið utan um sameiginlegar námslínur en reglur um það hafa verið í mótun frá sl. vori; um gervigreind og notkun þess í skólastarfinu; breytingar á varðveislutíma upplýsinga sem safnast með notkun aðgangskorta voru samþykktar á persónuverndarstefnunni og gerð var grein fyrir fjárhagsstöðu skólans sem er í góðum farvegi.
• Forstöðumenn stoðsviða funduðu líka, og þar var á sama hátt farið yfir fjárhagsstöðuna og rætt um mannauðsmál og fyrirhugaðar framkvæmdir í og í kringum skólann. Gott væri að setja á dagskrá Borgarlínuframkvæmdir og umferðarmál á starfsmannafundi nú í haust, en mikil orka hefur farið í þau mál. 
• Ný skorpa fer að fara í gang í innleiðingu stefnunnar og fyrsta törn að klárast. Vinnufundur um stefnuna er fyrirhugaður 8. október nk.  
• Fyrsti stjórnarfundur eftir sumarfrí verður í næstu viku, þar eru á dagskrá m.a. yfirlit yfir nemendafjölda; UTmál; áhættumat fyrir skólann, fjármögnun og rekstur skólans fyrstu sex mánuði ársins auk undirbúnings og skipulags vetrarins.
• Brunaboði fór í gang í Sólinni á miðvikudaginn 27. ágúst sl. Engin hætta var á ferðinni en eins og fram kom í tölvupósti til ykkar frá mannauðsdeild þá fór brunaboðinn í gang vegna þess að hindrun varð á merki línureykskynjara. Öryggisnefndin mun fara yfir atvikið og gera ráðstafanir í kjölfarið. Atvikið sjálft er síðan ágæt áminning um að taka svona boðum alltaf alvarlega og hér má rifja upp rýmingaráætlun skólans.
• Ég er annars að kenna þessa önn - sem lofar afar góðu og er góð tilbreyting. 

Annars vona ég að sumarið hafi farið vel með ykkur og þið hafið notið útiveru, samverustunda með ykkar nánasta fólki og náð að hvíla ykkur fyrir veturinn sem nú fer í hönd. Hlakka til að sjá ykkur á göngunum hress og kát.

Hlýjar kveðjur,
Ragnhildur

Komið þið sæl,  
og gleðilegt sumar. Mikið var gaman að hitta mörg ykkar í útskriftunum og sumargleði HRess.  Eins og venjan er á þessum tíma árs hefur verið nóg um að vera síðustu vikur en hér er það helsta í punktaformi:  

Útskriftir og umsóknir

• 5. júní rann út umsóknarfrestur um grunnnám við HR. Það var ánægjulegt að sjá hve mikill áhugi  er á námi við skólann. Heildarfjöldi umsókna að meðtöldum óyfirförnum umsóknum erlendis frá, var tæplega 4400 og því á pari við aðsóknina fyrir haustönn 2024. Yfirfarnar umsóknir í ár voru þó eilítið færri, tæplega 2800 en voru á sama tíma í fyrra tæplega 2900. Færri munu komast að en vilja þar sem rúmlega helmingur þeirra sem sækir um, eða um 1500 nýnemar, verða teknir inn í nám í haust.  
• 6. júní var útskrift úr Háskólagrunni sem er alltaf hátíðleg stund, en í ár útskrifuðust 34. Mörg þeirra hyggjast halda áfram í háskólanám en þess má geta að ræðumaðurinn við útskrift HA hafði einmitt klárað Háskólagrunn. Þau, sem ljúka einstökum viðbótarnámskeiðum við stúdentspróf í háskólagrunni, oftast til þess að geta fengið inngöngu í það nám sem þau óska, eru álíka mörg og þeir nemar sem klára grunninn, en þessi hópur útskrifast ekki. 
• 14. júní fór ég til Akureyrar og tók þátt í útskrift Háskólans á Akureyri þar sem 9 nemendur útskrifuðust úr tölvunarfræði frá HR sem kennd er í samstarfi við HA. Þetta samstarf er nú komið á unglingsaldur og það er gaman, að þegar gerð var greining á áhrifum þess reyndust 80% útskrifaðra vera að vinna við fag sitt, á Norðurlandi. Þetta skiptir því heilmiklu máli.  
• 21. júní var síðan komið að brautskráningu í Eldborg í Hörpu frá HR. Að þessu sinni útskrifuðust 697 nemendur og var sérstakt gleðiefni að aldrei hafa eins margir nemendur lokið doktorsprófi; þau voru alls nítján. Gleðin var allsráðandi, eins og alltaf. Það eru alger forréttindi að fá að taka þátt í henni og ég hvet starfsfólk til að mæta í t.d. eina útskrift á ári. Það er svo gaman að sjá þennan afrakstur starfsins!  

Fundir  

• Starfsmannafundur var haldinn 5. júní og var aðalefni fundarins starfsánægjukönnun sem Prósent framkvæmdi á vordögum. Almennt var niðurstaða könnunarinnar mjög góð, en eins og rætt var á fundinum er talsverður munur á niðurstöðum eftir einingum. Það þarf því bæði að vinna áfram með niðurstöðurnar niður á einingar og fyrir HR sem heild – og á meðal fókuspunkta þar eru bætt upplýsingaflæði, gagnsæi í innleiðingu stefnu, launamál og HR sem ein heild/HR-hjartað.  
• Framkvæmdaráðsfundur var 10. júní. Á dagskrá voru m.a. drög að reglum um skólagjöld fyrir nemendur utan EES, stofnun námsbrautar í klínískri taugasálfræði, og þverfaglegar námslínur. Eins og venjulega eru mál unnin uns hægt er að afgreiða þau í sátt og var því afgreiðslu regludraganna og viðmiða um þverfaglegar námslínur (Hver skipuleggur? Hver ber ábyrg? Hvernig ganga þær upp fjárhagslega?) frestað.  
• Stjórn HR kom saman til fundar 12. júní. Á dagskrá voru m.a. starfsáætlun stjórnar fyrir næsta vetur, staða umsókna og fjármögnun og fjárlög. Þá var rætt um hvenær hægt yrði að hefja vinnu við Háskólagarða við Nauthólsveg 87. 
• Skipulagsmál á svæðinu hafa tekið mikla athygli, m.a. tengt Háskólagörðum, svæðinu á milli þeirra og HR og borgarlínu. Einnig hafa verið fundir um húsnæðismál og stækkun á skólahúsnæðinu.  
• Þá voru haldnir vinnufundir með deildarforsetum og forstöðumönnum um stefnu HR, innleiðingu hennar og önnina framundan. Það er mjög gott að setjast yfir hvað hefur unnist, hvað gengur vel, hvar þarf að bæta og hvað fólk sér fyrir sér næsta vetur.  
• Stýrihópur NeurotechEU fundaði, m.a. um sameiginlega meistaragráðu, sem HR er að vinna að ásamt öðrum.  
• Í byrjun júní hitti ég Loga Einarsson, menningar-, háskóla- og nýsköpunarráðherra, á fundi þar sem við ræddum m.a. hugmyndir að nýjum námslínum, reynsluna af nýju fjármögnunarlíkani háskóla, stöðugleika líkansins og fleira. 
• Loks var svo fundur í samstarfsnefnd háskólastigsins þann 24. júní, þar sem rektorar samþykktu nýja ályktun um akademískt frelsi (þetta er samnorrænt átak vegna þróunar í heiminum), ræddu alþjóðasamstarf á þessum skrýtnu tímum og Jóni Atla Benediktssyni var þakkað fyrir samstarfið og Silja Bára Ómarsdóttir boðin velkomin í rektorahópinn sem nýr rektor HÍ. 

Ég vona að þið njótið sumarsins með ykkar fólki og ég hlakka til að sjá ykkur í ágúst!  

Hlýjar kveðjur,  
Ragnhildur 

Komið þið sæl,
apríl og maí eru gjarnan viðburðaríkir mánuðir í skólastarfinu og hefur verið nóg um að vera. Hér er það helsta í punktaformi.

• Í dymbilvikunni fórum við fjórir HR-ingar í heimsókn í German Jordan University í Jórdaníu. Þetta er tækniháskóli sem byggir á þýsku módeli og hefur bæði verið nýttur mikið sem skiptimöguleiki til okkar og þó nokkuð frá okkur.
• Aðalfundur HR var haldinn 30. apríl. Þórdís Ingadóttir prófessor við lagadeild talaði þar um tolla og WTO, að loknum venjulegum aðalfundarstörfum.
• Gæðamat háskóla heimsótti HR dagana 5.-8. maí í tengslum við stofnanaúttektina. Hjartans þakkir til ykkar allra sem hittuð nefndina og undirbjugguð heimsóknina. Við fáum örugglega mikið af hjálplegri endurgjöf út úr þessu, en nefndin hafði orð á því á lokafundi að gæðamenning og metnaður í skólastarfinu hefði komið sterkt fram frá öllum sem þau hittu.
• Kennsluþróunardagur Háskólagrunns var haldinn 13. maí og var mjög góður.
• Um miðjan maí var málstofa vísindafólks og svo rektorafundur (Board of Rectors) NeurotechEU haldinn í Bonn. Ég komst ekki vegna veikinda en Óli fór fyrir mína hönd. Stóra málið á fundinum var sameiginleg meistaragráða, sem við munum geta verið með í og er í vinnslu.
• Í liðinni viku var gerður samningur um samstarf HR og Reita fasteignafélags til þriggja ára. Þetta er spennandi samstarf og liður í því að efla sterk tengsl HR við atvinnulíf og ýta áfram undir nýsköpun. Á meðal þess sem samstarfið felur í sér er árleg hugmyndasamkeppni fyrir nemendur HR þar sem þau fá tækifæri til að takast á við raunveruleg verkefni.
• Þann 16. maí fundaði háskólaráð og mættu einnig deildarforsetar (eða staðgenglar þeirra) á fundinn. Aðalefni fundarins var framþróun námsbrauta og þróun styttri námsbrauta. Leitað var svara við allskonar spurningum eins og hvað deildir væru með á prjónunum og hvort HR væri að láta framhjá sér fara eitthvað svið sem væri spennandi að vinna á.
• Sl. mánudag komu svo fulltrúar frá Hagstofu Íslands í heimsókn og við fengum frábærar kynningar á gagnatengdum meistaranámslínum og rannsóknum við HR sem eru að hluta byggðar á gögnum frá Hagstofunni.
• Í vikunni var líka heils dags vinnufundur um húsnæðismál og eftirfylgni úttektar Gæðamats háskóla.
• Það er fjöldi doktorsvarna þessa dagana, sem er svo mikið gleðiefni!

Þá hafa verið fjölmargir viðburðir í skólanum undanfarið; bara í þessari viku var stór ráðstefna hér í húsi í samstarfi við KSÍ, það var opið hús vegna grunnnáms, vísindaferð Opna háskólans og svo í dag er einn stærsti viðburður hvers árs, Stelpur, stálp og tækni.

Það er líka nóg framundan! Við verðum með starfsmannafund um mánaðamótin, nýi viðburðurinn Strákar og stálp í háskóla er þann 4. júní, daginn eftir er umsóknarfrestur í grunnnám og þann 6. júní er útskrift úr Háskólagrunni. 21. júní er það svo brautskráning kandídata í Eldborg í Hörpu. Það eru skemmtilegar og annasamar vikur framundan - njótið snemmsumarsins!

Hlýjar kveðjur,
Ragnhildur

Komið þið sæl,
það er prófatíð hjá nemendum og nóg að gera í tengslum við það hjá okkur flestum, auk undirbúnings þriggja vikna námskeiða sem hefjast síðar í mánuðinum. Það er því nóg framundan en síðustu vikur hafa líka verið viðburðaríkar og hér er það helsta í punktaformi:

• Um mánaðamótin var ég í New York á stjórnarfundi Stofnunar Leifs Eiríkssonar, en hún veitir Bandaríkjamönnum námsstyrki til Íslands og Íslendingum til Bandaríkjanna. Stjórnin fundar tvisvar á ári og á fundinum nú var verið að velja h.u.b. 10  styrkþega næsta árs, byggt á tillögum matsnefndar.
• 2. apríl var framkvæmdaráðsfundur þar sem starfsreglur framkvæmdaráðs voru m.a. samþykktar, sameiginlegar þverfaglegar námslínur voru til umræðu sem og reglur HR um skólagjöld nemenda utan Evrópu. Þá var staðfest að ein framgangsnefnd hefði verið samþykkt milli funda.
• Aðalfundir Grunnstoða (fasteignafélags HR) og Bakhjarla (sem halda utan um rannsóknasjóð og aðra slíka sjóði) voru haldnir 3. apríl og var aðalefni fundanna samþykkt ársreikninga 2024.
• Sama efni (ársreikningar) var uppistaðan í stjórnarfundi HR föstudaginn 4. apríl. Strax í kjölfar hans var haldinn starfsmannafundur þar sem ársreikningar 2024 voru kynntir, auk þess sem stuttar kynningar voru á nýju stoðsviðunum nemendaþjónustu og háskólaskrifstofu.
• Í byrjun apríl komu skólameistarar framhaldsskóla í heimsókn í HR. Þessi hópur kom síðast í heimsókn fyrir Covid svo það var frábært að fá þau til okkar. Það var mikið rætt um inntökuskilyrði- og kröfur í mismunandi deildir HR, hvernig fyrsta árið er í háskóla, skipti á milli skólastiga og fleira. Fulltrúar flestra deilda og þeirra eininga sem þjónusta nemendur tóku þátt í fundinum og það var gaman. Allir eru sammála um að endurtaka þetta fyrr en síðar.
• Seinni hluta sömu viku fundaði ég með Arctic Circle um samstarf þeirra og HR
• Vikunni lauk svo með fundi með borgarstjóra og fleirum í Ráðhúsinu þar sem við ræddum uppbyggingu á svæði HR.
• 7.-9. apríl fór hópur úr HR í heimsókn til Háskólans í Bonn til að skoða möguleika á tvíhliða samstarfi, en skólarnir eru í samstarfi í NeurotechEU. Bonn er afskaplega sterkur háskóli og það var frábært að heimsækja þau, almennt og svo í heimsóknum milli deilda og eininga.
• 9.-11. apríl var árleg ráðstefna European University Association (EUA). Þar koma saman ríflega 500 háskólastjórnendur frá Evrópu, og reynslan hefur sýnt okkur að hún er mjög gagnleg. Bæði eru litlir spjallfundir íslenskra, norrænna og NeurotechEU rektora sem eru á svæðinu, það er lokaður trúnaðarfundur rektora (að þessu sinni um viðbragðsáætlanir og krísur af ýmsu tagi) og svo keyrt á þremur ráðstefnulínum - um allt frá fjármálum háskóla og hvernig eigi að sækja auknar tekjur yfir í opin vísindi, tækni í kennslu, sjálfbærni í rekstri og í kennslu og Evrópustyrki. 
• Nú í dymbilvikunni erum við síðan fjórir HR-ingar í heimsókn í German Jordanian University í Jórdaníu – tækniháskóla sem byggir á þýsku módeli og bæði verið mikið nýttur sem skiptimöguleiki til okkar og þó nokkuð frá okkur (einkum VFD og VD) en leikur líka stórt hlutverk í tæknimenntun sýrlenskra flóttamanna o.fl. Ég hlakka til að hitta þau, stilla saman strengi og hugsa hvernig samstarfið verður sem gagnlegast. 

Eftir páska bíða svo þriggja vikna námskeiðin, aðalfundur HR og heimsókn úttektarnefndar. Ég vona að sem flestir gefi sér tíma til að svara starfsánægjukönnun, sem send var út í vikunni. Við notum Gallup almennt og reglulegar, en þessi könnun hefur verið gerð á eins til tveggja ára fresti í meira en áratug, svo það væri frábært að fá góða svörun núna. Það hefur líka heilmikið gengið á síðan hún var síðast lögð fyrir haustið 2022!

En fyrst er það páskafríið! Ég óska ykkur öllum gleðilegra páska og vona að þið njótið hátíðarinnar með ykkar fólki.

Hlýjar kveðjur,
Ragnhildur

Það helsta frá síðustu vikum

Komið þið sæl,
þá fer að líða að lokum 12 vikna annarinnar. Síðustu vikur hafa verið fjörugar að öðru leyti líka: Margir viðburðir, vísindafólk úr HR hefur og verið áberandi í fjölmiðlum, m.a. vegna heilaviku og heimsmálanna, og nemendur hafa einnig gert víðreist erlendis í alþjóðlegum keppnum og kynningum. Hér er yfirlit yfir það helsta í punktaformi:

Fundir

• Í byrjun mars fór fram rýni stjórnenda vegna jafnlaunavottunar og úttekt í framhaldinu, sem kom mjög vel út, og verður kynnt á starfsmannafundi í vor.

• Það hafa einnig verið tíðir fundir vegna húsnæðis- og alþjóðamála.

• 6. mars funduðum við Gullý með kanadíska sendiherranum og ræddum samstarf HR við kanadíska háskóla. Það er áhugi á að auka það enn frekar.

• 11. mars var framkvæmdaráðsfundur. Til umræðu voru starfsreglur framkvæmdaráðs, skipurit HR og staða húsnæðismála. Þá var ein framgangsnefnd samþykkt.

• 14. mars var stjórnarfundur þar sem m.a. var farið yfir samþykktir, skipulag og starfsreglur; tillögu að starfskjarastefnu og aðalfundur og háskólaráðsfundur í maí voru undirbúnir. Mikilvægast var e.t.v. að stjórnendur skólans fengu umboð til að vinna áfram að húsnæðismálum á þeim nótum sem við höfum verið að gera og rætt var á framkvæmdaráðsfundi.

• Fundað með SFHR um ýmis mál, en nú er stóru viðburðunum hjá þeim á vorönn lokið (að frátöldum kosningum).

Viðburðir

• Háskóladagurinn var haldinn á Höfn, Egilsstöðum og Akureyri.
• Sálfræðideild HR hélt upp á Alþjóðlega heilaviku með greinaröð á Vísi og tveimur viðburðum.
• Tölvunarfræðideild hélt í vikunni málþing um framtíð íslenska heilbrigðiskerfisins þar sem forstjóri Landspítalans og erlendir sérfræðingar voru á meðal framsögumanna.
• Þá hélt lagadeild ráðstefnu í vikunni í Hörpu undir yfirskriftinni Lög og gervigreind: lögfræðin er mætt til leiks.
• Forritunarkeppni framhaldsskólanna fór fram 8. mars og lukkaðist vel.

Annað

• Ársreikningur 2024 liggur fyrir, og verður kynnt á starfsmannafundi þegar það hefur verið endurskoðað og verið samþykkt af stjórn. Ég get þó sagt strax að uppgjörið breytir í engu þeirri stefnu sem við erum að vinna eftir.
• Þarfagreining á húsnæði gengur vel og það verður vonandi komin stór mynd í byrjun apríl.
• Nemar hafa farið víða í keppnum og skemmtilegheitum og sýnt okkar besta andlit:
  • HR-ingar náðu besta árangri skólans til þessa í alþjóðlegri háskólakeppni í fjármálaviðskiptum sem fram fór í Toronto í Kanada
  • Lið HR varð í 2. sæti í keppninni Nordic Case Challenge.
  • Sigurlið Vitans var síðan í Boston í vikunni ásamt mér, Ólöfu og Hrafntinnu þar sem þau kynntu sér íslenskan sjávarútveg og kynntu verkefni sitt úr keppninni bæði á sjávarútvegssýningunni og í heimsókn okkar til University of Southern Maine. Þar heimsóttum við Sjávarklasa, ýmis löbb (og fylltumst græjuöfund) auk þess sem við Jacqueline Edmondson, rektor, fórum yfir ýmis mál.
• Undirbúningur fyrir heimsókn tengdri Stofnunarúttekt gæðamats er í fullum gangi.

Ég minni á dagskrá rektors hér á síðunni þar sem nálgast má upplýsingar um það sem er framundan.

Hlýjar kveðjur,
Ragnhildur

Undanfarnar vikur  
 
Komið þið sæl,  
Skólaárið þýtur hjá og tólf vikna námskeið þessarar vorannar eru nú rúmlega hálfnuð. Undanfarinn mánuður hefur verið annasamur með m.a. útskrift, skilum á sjálfsmatsskýrslu HR vegna stofnunarúttektar (Institution-Wide Review) og háskóladeginum. Hér er stutt yfirlit: 

• Sjálfsmatsskýrslunni (IWR) var skilað þann 25. febrúar. Þetta er sjálfsmatsskýrsla skólans, þar sem er útskýrt hvernig við tryggjum gæði starfseminnar; náms og kennslu, rannsókna og nýsköpunar og loks gæðakerfis og stefnumiðaðrar stjórnunar. Meiri upplýsingar um stofnunarúttektir eru á iaqa.is. Í maí eigum við svo von á vettvangsheimsókn úttektarnefndarinnar sem mun að því loknu skila úttektarskýrslu með niðurstöðum sínum. 

Fundir 

• Árlegur fundur HR og Gæðamats háskóla var í lok janúar. 

• Þá var einnig vinnudagur með öllum deildarforsetum til að ræða þróun skólans næstu misseri, t.d. m.t.t. fjölgunar nemenda, námsframboðs og vinnuálags á starfsfólks. 

• Þann 7. febrúar var fundur í háskólaráði. Hann sátu að vanda, auk háskólaráðs, fulltrúi SFHR, deildarforsetar, sviðsforsetar, framkvæmdastjóri og rektor. Til umræðu voru m.a. skipulag og starfsreglur, öryggismál og innleiðing stefnunnar.  

• 11. febrúar var framkvæmdaráðsfundur – að því er við komumst næst sá fyrsti í sögu skólans sem rektor var ekki á! Óli stýrði fundi og var eftirfarandi samþykkt á fundinum: Gæðastefna; stefna um opinn aðgang; reglur um lokaverkefni, og tvær framgangsnefndir. 

• Þann 18. febrúar var stjórnarfundur þar sem m.a. var rætt um húsnæðismál, starfsmanna- og jafnréttismál, eignastýringu HR og mat á störfum stjórnar og stjórnenda.  

• Í lok febrúar hitti ég svo úttektarnefnd sem er að taka út háskólann í Lille í þeirra opinbera gæðamati, en við erum í samstarfi við skólann í gegnum NeurotechEU og vorum því kölluð til sem haghafi.  

Viðburðir 

• Þann 1. febrúar var útskrift við hátíðlega athöfn í Eldborg í Hörpu og það er jú alltaf jafn gleðilegt og gaman!  

• Svo var forsetalistaathöfn 19. febrúar og það var líka dásamlegt!  

• Háskóladagurinn var 1. mars og gekk glimrandi vel. Fjöldi fólks heimsótti okkur og bæði opnar kennslustundir deilda og gönguferðir kynningarráðs nemenda voru vel sótt. Takk öll sem tókuð þátt í deginum! 

Yfirlit yfir það sem er framundan má síðan finna á heimasíðu HR á undirsíðu rektors: Rektor | Háskólinn í Reykjavík 

Síðan er nýlega komin í loftið og er bæði hugsuð til miðlunar út á við og inn á við. Þarna birti ég t.d. ræður og ávörp og vonast til að veita tilvonandi nemendum og öðrum sem eru forvitin um HR einhverja smá tilfinningu fyrir því hvernig skólinn er, en við sjáum að slíkar síður annarra skóla eru allnokkuð heimsóttar. 

Frekar en að senda stóra hóppósta ætla ég að gera tilraun með að nota síðuna líka fyrir upplýsingar um skólastarfið: Birta þar þessi fréttabréf sem og það helsta úr dagatali rektors og hvað er framundan. Hún er auðvitað opin, þannig að ef þetta reynist of mikið, þá bara finnum við aðra leið! Endilega hendið til mín línu ef þið hafið skoðun á birtingarvettvangi eða tempói - eða öðru! 

Hlýjar kveðjur, 
Ragnhildur